حبر وحكاية
شعر وقصص قصيرة وروايات، وأغاني من الشعر .
بقلم محمود أحمد عبدالفتاح
شاهد حتى النهاية
الفصل الأول
....... " مبروك البراءة يحاج إسماعيل ....
الله ينور عليك ي متر حسابك هيوصلك وفوقيه بوسه كمان .
نادر ... ي نادر
نعم ي حسام بيه مبروك علينا القضية.
يلا ي نادر جهز العربية علشان ورانا شغل كتير واعمل حسابك هنتأخر النهارده فى المكتب شوية .
حاضر ي حسام بيه هو فيه حاجه ولا ايه.
لا عندنا ضغط شغل الاسبوع ده وعايزين نخلصه ويلا بقى بلاش تأخير.
حاضر ي متر هجيب العربيه واجى .
اتفضلى الشاى ي سعاد هانم .
طلعتى شاطره يبت ي هدى وأشطر من الزفتة اللى كانت اسمها سميحه دى .
ربنا يخليكى لينا ي هنام عنيا ليكوا .
طب يلا روحى شوفى شغلك علشان أستاذ حسام قرب يرجع
ونادى على دكتور دنيا من جوه علشان عايزاها.
حاضر ي هانم .
مالك ي ناهد يبنتى .
تعبت اوى من اللف النهارده ي عم ربيع وياريت جبت خاجه تستاهل .
قولى الحمد لله يبنتى كله رضا ارتاحى شوية علشان اللى فى بطنك ده وانا هعمل أى حاجه ناكلها .
الحمد لله ي عمى ربيع ربنا يخليك ليا وقفت جمبى اكتر من ابويا نفسه .
طيب ارتاحى شويه وأنا هشوف الواد سعد رجع بأيه هو كمان .
العربية جاهزة ي حسام بيه هنطلع على المكتب علطول ولا هنروح ناكل الأول ؟
لا هنروح المكتب ونبقا نطلب أكل هناك .
صحيح ي حسام بيه هو ازاى كسبنا القضية دى ومسارها اتغير فى يومين كده ازاى !!
الواد ابن الحاج اسماعيل قاتل وبصماته على كل حتة فى موقع الجريمة ومفيش اى دليل واحد على براءته .
ي نادر أنت شغال معايا من زمان وعارف أنه كل عقدة وليها حل والفلوس حل لكل حاجه والحاج اسماعيل مفيش عنده أغلى من ابنه ههههه.
كل يوم بتعلم منك ي سيادة المستشار حسام الراوى .
هانت ي نادر عايزك بس تركز شويه فى الشغل علشان اخلص الامتحان ويبقى سيادة المستشار رسمى .
بص اعتبر القواضى الجاية كلها فى جيبك أنت وراك أسود .
لما نشوف يعم الأسد .... اطلب لينا أكل علشان نبدأ شغل علطول .
نعم ي ماما هدى قالتلى إنك عايزانى خير فيه حاجه .
ي حبيبتى انتى قاعده فى أوضتك مخرجتيش تروحى دروسك من امبارح فيكى حاجه ؟
لا يماما كويسه أنا بس حاسه نفسى مخنوقه وعايزه أكون مع نفسى شويه .
بس ي حبيبتى دى ثانوية عامة وأنتى دكتورة المستقبل هننسى حلمنا ولا أى .
حاضر ي ماما هنزل دروسى خلاص .
أى ياض ي سعد جبت أى .
الحمد لله يحاج ربيع ربنا كرمنى أخر كرم النهارده لقيت اتنين شكلهم نضيف اوى يحاج وكانوا جايبين أكل كتير أوى ورموا منه كتير شكلها لحمة وحاجات حلوه أوى .
جدع ياض ي سعد ربنا كبير الحمد لله كله رزق العيل اللى فى بطن الست الغلبانه دى .
هروح اصحيها علشان ناكل مع بعضنا .
لا سيبها دلوقتى ي سعد لسه نايمه صلى العصر على ما ترتاح شويه وناكل بعد كده .
ألو ...
أيوه ي سعاد عامله ايه.
الحمد لله ي حسام أنت مرجعتش ليه البيت لحد دلوقتى .
عندى شغل كتير هخلص وارجع علطول .
أوعى تبات بره ي حسام علشان مش هعديها على خير .
فيه ايه ي سعاد أنا فى شغل مش وقته الكلام ده .
حسام أنا عرفتك وخلاص ولا ناسى اللى حصل .
وأنتى مش ناوية تنسى يعنى ولا ايه عدى تلت شهور على الكلام ده انسى بقى .
مش هنسى ي حسام.... سلام .
ست مفترية ... سديتى نفسى منك لله .
ادخل ي نادر .
أحلى جمبرى وكفتة لسيادة المستشار .
خد الأكل ده واخرج ي نادر ومش عايز أشوف أى حد خالص دلوقتى.
حصل حاجه ولا أيه ي سيادة المستشار.
اطلع بره ي نادر وشوف شغلك .
حاضر ي حسام بيه .
مين اللى بيتصل ده كمان ... ألو .
حسام بيه ....
سميحة ..!!
مدام سعاد بتتصل عليا ليه !!
ألو ... اهلا ي مدام أخبارك أى .
مش تمام ي نادر ...عايزاك فى موضوع مهم بس متعرفش حسام اى حاجه .
فيه حاجه ي مدام ولا ايه .
لما اشوفك هتعرف كل حاجه .
مالك ي دنيا ؟؟
سبينى فى حالى ي ساره أنا مش نقصاكى .
يبنتى بتواصل معاكى من امبارح مش عارفة أوصلك خالص.
مخنوقة شوية ومعنديش طاقة اتكلم حد .
طب أى رأيك بعد الدرس تيجى تقعدى معايا شوية وكده كده مفيش حد فى البيت أهلى كلهم خرجوا ومش راجعين النهارده .
ماشى .
ناهد .. ي ناهد .... اصحى يبنتى علشان ناكل الحمد لله الاكل النهارده كتير اهو .
حاضر ي عم ربيع ...الواحد عايز ينام أسبوع يرتاح فيه .
معلش يبنتى خير بإذن الله ومن الأسبوع الجاى متنزليش تلفى تانى خليك هنا واحنا هنخرج نشوف رزقنا وربنا يرزقنا جميعا.
ماشى ي عم ربيع .
يلا ي سعد علشان ناكل .
يلا ي عم ربيع علشان بطنى بتصوصو من الجوع .
اه .... ااااه بطنى ي عم ربيع الحقنى ي عم ربيع أنا بولد .
أيوه أنا سميحه ي حسام وده رقم المستشفى ...تعالى بسرعه انا بولد .
طيب أنا جاى بس متعرفيش اى حد أنه تعرفينى لحد ما أوصل .
نادر .... ي نادر .
نعم ي حسام بيه .
خلى بالك من المكتب عندى مشوار مهم وابقى اقفل لما الشغل يخلص وعدى على البيت عرفت مراتى إنى هبات بره البيت
علشان فيه حد من المكتب تعبان ولازم أبات معاه.
ماشى ي حسام بيه.
مالك بقى ي دنيا احكيلى أيه اللى مزعلك ومخليكى مختفيه كده .
ضغط ضغط ضغط عايزين ابقى دكتوره وانا اصلا مبحبش الطب ولا عايزاه انا عايزه ادخل فنون جميله ومفيش حد حاسس بيا ولا بيسمع مشاكلى ولا مهتمين انه فيه عندهم بنت أصلا كل هدفهم شكلهم ومستواهم وبنتهم لازم تبقى دكتوره علشان تبقى واجهة ليهم واشرفهم انا حقيقى تعبت أنا عايزه اهرب من العالم دا كله .
اهدى بس كدا يبنتى وبعدين مش انا صحبتك فى أى وقت عايزه تفضفضى ومحتاجه حد يسمعك ابعتيلى وانا هساعدك وممكن كمان تجيلى كل يوم نذاكر شويه مع بعض ولما نيجى للكليه نشوف وقتها ربنا هيكتبلنا أيه .
فيه واحد على الباب اسمه نادر ي سعاد هانم .
دخليه ي هدى وروحى اعملى حاجه نشربها .
أهلا ي مدام سعاد حسام بيه عرفنى اجى أقولك أنه هيبات بره علشان فيه واحد من المكتب تعبان وهو معاه فى المستشفى .
حسام اللى قالك كده !!
أيوه ي مدام .
طب اقعد ي نادر .
فيه حاجه ي مدام ؟
بص ي نادر أنا عايزه منك خدمة ضرورى ومش عايزه حسام يعرف عنها أى حاجه .
أنا تحت أمرك ي مدام بس أيه هى ؟!
أنا عايزاك تراقب حسام وتعرفنى عنه كل حاجه بيروح فين بيقابل مين وبيكلم مين .
بسس ...
مفيش بس ولا حاجه انت موافق.
روح ي سعد نادى على الداية بتاعة المنطقة بسرعه .
مش قادره ي عم ربيع بموت .
استحملى يبنتى خمس دقايق بس أنا هجهز ليها مايه على ما توصل .
أى الزحمة واللمة دى !! عالم بهايم .
معلش ي أستاذ فيه وحده بتولد استحمل دقيقتين بس .
امال عملوا المستشفيات ليه علشان تروحوا تولدوها هناك مش توقفوا الطريق .
ي بيه دى بنت غلبانه ومفيش معانا فلوس نروح مستشفى .
طيب خلاص هترغى معايا ولا أى !؟
الحق ي عم ربيع ..
فيه أيه ياض ي سعد ؟
البت سمر الداية بتقول ناهد بتنزف جامد وفقدت الوعى .
يا اسمك أى انت .....
أنا ي بيه ؟!
ايوه .
اسمى ربيع ي بيه .
انا بعتذرلك ي ربيع على الكلمتين اللى قولتهم بس أنا متأخر وعندى شغل مهم جدا .
احنا اللى آسفين ليك ي بيه حقك على راسى أنا .
لا خلاص مش مشكله اقدر اساعدكوا بأيه علشان اعبر عن اعتذارى .
ألف شكر ي بيه مش محتاجين اى حاجه .
طب عايزك فى كلمتين فى العربيه تعالى اركب .
حاضر بيه ... خير إن شاء الله فيه حاجه اقدر اساعد بيها ؟
انا شايف بنتك حالتها صعبه ومحتاجه مستشفى ضرورى .
بس ي بيه ....
استنى اكمل كلامى ي ربيع .
انا مستعد أخدها المستشفى واتكفل بكل تكاليف العلاج واوفر ليكوا شغل عندى ... أى رأيك فى الكلام دا ؟
كتر خيرك ي بيه بس كل ده ليه ؟
أكيد فيه مقابل بس لما توافق الأول .
أنا موافق بأى حاجه ي بيه حتى لو هنشتغل خدامين عندك كلنا .
بتفهم ي ربيع وانا بحب الناس اللى بتفهم .
هطلب عربية إسعاف حالا تيجى تاخدها.
دكتوره دنيا جت .
أيوه ي ماما كنت عند صحبتى بنذاكر شويه .
ماشى ادخلى خلصى بقيت مذاكرتك وانا هخلى هدى تحضرلك الاكل .
لا أنا اكلت مع صحبتى بره .
دنيا ... أنتى ازاى تاكلى بره البيت مش قولت قبل كدا ممنوع .
بس ي ماما صحبتى عرضت عليا ومعرفتش أرفض.
مش بس وصحبتك دى متعرفيهاش تانى ... احنا مش ناقصين مرض.
حاضر ي ماما.
عايز أسئل عن وحده اسمها سميحه جايه تولد .
غرفة 6 الدور التالت ي فندم .
تمام شكرا .
لو سمحت ....!
نعم .
حضرتك جوزها ...؟
أيوه.
طب فيه حق التذكرة معلش .
طيب خدى دول علشان مستعجل .
بس دول 1000 جنيه ي فندم والتذكره ب 300 جنيه بس .... ي فندم.
استنى ي فندم ممنوع تدخل لسه بتولد .
الطفل كويس طيب ؟
الاتنين وضعهم كويس متقلقش .
بقولك ....
نعم ي فندم .
انتى اسمك أيه .
ثناء.
طب عايزك فى كلمتين ي ثناء .
بسرعه بس حضرتك .
فيه حاله اسمها ناهد لسه جايه فى الاسعاف كانت بتولد وحالتها صعبه ....عايزك تطمنينى عليها .
بس كدا .... من عنيا حاضر .
مش بالظبط بس هنشوف بعد كده .
ألو .... ي مدام سعاد .
ايوه ي نادر طمنى عرفت حاجه !!
عرفت حاجات كتير أوى بس مش هينفع فى التليفون هقابلك بكره ان شاء الله واقولك كل حاجه .
ماشى وانا عند وعدى ليك ي نادر.
ألف مبروك ي حبيبتى جبتى ولد زى القمر .
بجد ي حسام بيه ..!
بجد ي سميحه .... هنسميه زياد .
حلو الاسم ي حسام بيه بس هيبقى اسمه زياد أيه ....! هتخليه على اسمك ي حسام بيه ..!
متفكريش فى الكلام دا دلوقتى ي سمحيه هتصرف.
انا بس عايزه ابنى يعيش حياته بنى آدم طبيعى.
يوووه قولت هتصرف يبقى هتصرف ......أنا هرجع دلوقتى البيت علشان عندى شوية شغل هبعتلك نادر بالعربيه يوصلك .
حسام بيه ... حسام بيه !
عايز أيه انت كمان ؟!
يبيه انا كنت عايز اقولك حاجه .
انطق علشان مستعجل .
خلى البنت تروح بابنها النهارده بس خليها تشوفه وانا هجيبه ليك لحد البيت لو عايز.
احنا مش كنا اتفقنا ..!
ي بيه البت تعبانه لو ملقتش ابنها علطول كده هتموت فيها .
طيب اسمع اللى هقولك عليه ونفذه ........
حاضر ي بيه .... تحت أمرك .
ألو .....
معاك ي حسام بيه .
انت نايم ولا أيه ي نادر !
كنت لسه هنام ي حسام بيه فيه حاجه ولا أيه ؟
عايزك الصبح قبل ما تيجى على المكتب تعدى على مستشفى الشفاء تاخد سميحه وترجعها على بيتها .
سميحه !!
أيوه ي نادر فيه حاجه ولا أيه ؟
لا ابدا ي حسام بيه .
وأسمع مش عايز حد نهائى يعرف بالكلام دا .
تحت أمرك ي حسام بيه .
ألو ... ازيك ي ساره .
خير ي دنيا فيه حاجه ولا ايه .
مفيش ماما كالعاده بهدلتنى علشان أكلنا مع بعض برا البيت وعملت حواراتها بتاعة كل مره دى .
معلش ي دنيا هى بتخاف عليكى بزياده وده شعور أمومه وحاجه حلوه مش وحشه .
بتخاف عليا هههههههه..... انتى مش عارفه حاجه ي ساره .
أنتى اللى اكيد فاهمها غلط بس ي دنيا .
هبقى احكيلك لما ننقابل ويلا باى علشان ماما لو شافتنى بكلمك هتطير رقبتى المره دى هههههه.
ههههههه ماشى دكتوره باى.
شرفت ي بيه ما لسه بدرى .
سعاد انا مش شايف قدامى دلوقتى ومش فايق لأى حاجه دلوقتى .
هو أنت بقيت سائل فينا أصلا ولا تعرف إنك عندك بيت من لما اسمها أيه الخدامة دى دخلت حياتنا ....
سعاد كلمه كمان هطلقك وارميكى فى الشارع !!
هى وصلت لكده ....!!
ي هدى ..... ي زفته ...،
نعم ي حسام بيه .
اعمليلى قهوة بسرعه وهاتيها على مكتبى .
واقفه ليه كده ي حبيبتى ...! تعالى عايز اقولك حاجه .
نعم ي بابا ...
بصى ي دنيا مش عايز حاجه تأثر عليكى وعلى مذاكرتك كل اللى الخناقات دى عاديه ي حبيبتى وبتتحل لما نهدى ده ضغط علينا بس .
بابا هو أنت ممكن تطلق ماما فعلا .!!
أكيد لا ي حبيبة بابا دى كلمة فى وقت غضب بس .
القهوة ي حسام بيه .... تأمر بحاجه تانى .!
اه اقعدى ي هدى عايزك فى حاجه .
وانتى ي دنيا روحى اوضتك يلا علشان تنامى مش عايزين نتأخر ونعطل مذاكرتنا ولا أيه ي دكتورتنا .
حاضر ي بابا تصبح على خير .
اقفلى الباب دا ي هدى وتعالى اقعدى .
خير ي بيه انا عملت حاجه زعلتك ولا حاجه ي بيه .!!
لا انا عايزك فى موضوع تانى خالص استنى بس واسمعى ......
انتى تعرفى عم عوض الجناينى !!
اعرفه ازاى ي بيه ..!
يعنى منين متجوز ولا لا حاله واهله فى البلد حالهم عامل ازاى .، أنا كنت بقعد معاه شوية نشرب الشاى لما يجى وكان بيقعد يحكيلى انه متجوز وعنده 7 عيال وبيجرى على مصاريفهم اهله فى الصعيد وهو بيجى القاهرة هنا يشتغل ويرجع ليهم اسبوع كل شهر .
تعرفى اسمه الثلاثى ...!
تقريبا كده ي بيه اسمه عوض سالم الغريبى .
ماشى ي هدى خلاص .....مش عايز اى مخلوق يعرف أحنا كنا بنتكلم فى أيه .... أنا عرفت أنه عنده مشكلة فى البلد وبتأكد
علشان اساعده بس الكلام دا سر .
أمرك ي بيه ولا شوفتك أصلا.
جدعه ي هدى .. خدى ال 200 جنيه دى خليها معاكى .
يدوم عزك ي حسام بيه .
هدى ...!،
نعم ي سعاد هانم .
حسام كان عايز منك أيه !؟
كان بيوصينى على دكتوره دنيا وبيقولى اخلى بالى منها علشان تعرف تذاكر حتى ادانى ال 200 جنيه دى .
بس كدا ..؟
ايوه ي هانم هخبى عنك حاجه ليه بس ده حتى حسام بيه بيحبك موت .
طب روحى شوفى شغلك اجرى ... انتى هتحكى معايا ولا أيه .
العفو ي هانم .
عامله أيه دلوقتى ي ناهد ي بنتى ...!
الحمد لله ي عم ربيع وتائب كمان كويس اهو .
بسم الله ماشاء الله هتسميه تائب ... اسم جميل ربنا يحفظه ليكى يبنتى .
يارب ي عمى ربيع علشان قلبى مقبوض عليه أوى كان نفسى يبقى فى مكان يحميه وأب يشيل اسمه بس ..... قدرنا جه كده .
يبنتى احمدى ربك واحنا جمبك اهو .
مش هعرف انام غير لما النهار يطلع علشان اكون مرتاحه ومطمنه على تائب .
ألو .....
أيوه ي حسام بيه .
خالد عايزك تنزل بكره بدرى تفتح المكتب وتجهز الملفات على ما اوصل .
حاضر ي حسام بيه ...هو نادر فيه حاجه ولا أيه !
لا هو اخد إذن منى علشان عنده مشوار ضرورى الصبح قبل المكتب
انزل انت وافتح هتلاقى نسخة من المفتاح مع أستاذ عزت اللى جمب المكتب .
تحت امرك ي حسام بيه .
سلام .
هدى ..!
صباح الخير ي حسام بيه .
اعمليلى قهوة وجهزى الفطار .
حاضر ي حسام بيه .
ألو ...
صباح الفل ي سيادة المستشار .
ايه ي نادر انت لسه نايم !
لا صحيت من نص ساعه وهلبس واطلع على المستشفى علطول .
ماشى عرفنى لما تخلص هستناك فى المكتب .
تعالى ي هدى ..
القهوة ي حسام بيه .
تسلم إيدك .
أيه الرضا دا كله ي حسام بيه هههه .
طيب مش هتروحى تجهزى الفطار ولا عايزه اقلب معاكى تانى.
حالا ي حسام بيه .
صباح الخير ي عم ربيع .
صباح الخير ي ناهد ي بنتى .... لسه منمتيش لحد دلوقتى .!
مش قادره أنام واسيب تائب كده خايفه عليه .
طيب ارتاحى دلوقتى شويه وأنا هقعد جمب تائب على ما تصحى وهخلى بالى منه كويس علشان صحتك مينفعش تفضلى صاحيه طول اليوم كده .
حاضر ي عم ربيع .
انا هخرج مع أصحابى شويه ي حسام .
حاضر ي سعاد بس متتأخريش .
ماشى ي حبيبى.
غرفة مدام سميحه لو سمحتى !
غرفة 13 ي فندم .
طب جهزى ورق الخروج على ما اجى علشان امضيها .
عامله أيه ي مدام النهارده .!
نادر ..! حسام اللى بعتك !
ايوه هوصلك البيت هو موصينى مخصوص .
وهو فين .؟
عنده ضغط شغل فى المكتب الفتره دى بس هيعدى عليكى بالليل .
هنروح فين !
حسام بيه مأجر شقة على طرف المدينة هوصلك فيها .
جدع ي خالد شاطر وليك مستقبل كويس .
تعليمك ي حسام بيه .
طيب مش هتجبلنا فطار بقى ولا ايه .
فورا انت تأمر بس .
اه صح انا مش هشوف أى ملفات قضايا النهارده وبلغ التيم يستعدوا بقضية زكريا المكرمى .
تحت أمرك ي حسام بيه .
ساره ..ي ساره ..
أى الروقان ده ي دكتورتنا ...
ماما خرجت مع اصحابها وبابا راح المكتب هجيلك النهارده ونقعد براحتنا طول اليوم .
علشان كده رايقه ... ماشى هستناكى .
نص ساعه واكون عندك .... يلا باى باى.
بااى .
ألو ....
أيوه ي نادر طمنى عملت أيه .
كل اللى قولته بالحرف ي سيادة المستشار ومدام سميحه فى بيتها زى ما طلبت .
برافو عليك ي نادر هستناك نفطر مع بعض .
معلش ي حسام بيه انا كنت عايز استأذنك اتأخر شويه انزل
اشترى شوية طلبات للبيت واجى بعد الظهر .
خلاص ماشى بس متتأخرش علشان التيم هيبدأ فى قضية زكريا المكرمى مش عايزين اى غلط وعايزين نخلصها فى أسرع وقت متنساش الراجل دا مينفعش يتحكم عليه احنا مش قد غضبه .
إن شاء الله فى خلال 48 ساعه هتكون جاهزه على مكتبك بالبراءة متشغلش بالك أنت ي سيادة المستشار .
ازيك ي دنيا ...
الحمد لله ي ساره...عملتى خطه نقضى بيها اليوم انا مش عايزه نضيع ولا ثانيه .
اهدى على نفسك بس احنا هنذاكر شويه ونتسلى شويه هنعمل كل حاجه دلوقتى .
انا مكنتش اعرف إنك مثقه اوى كده ي ساره هههه.
انا بحب اقرأ القصص والروايات بتعيشنى فى العالم اللى بحبه .
وبتقرأى أيه دلوقتى بقى ..!
بقرأ قصة بعنوان حرب الشياطين القصه روعه وبحب اقرأ للكاتب ده علطول .... هحكيها ليكى وهتحبيها
بس تعالى ندخل المطبخ الاول نلعب شويه نعمل اى حاجه كده .
يلا بينا انا جايه علشان كده هههه .
ألو ....
أنا فى ترابيزة 7 .
ماشى شوفتك .
ازيك ي نادر ..
سعاد هانم نورتى المكان .
ألو ... عم ربيع .
معاك ي بيه انا مستنى اهو والواد معايا وأمه نايمه .
هعدى عليك ... خمس دقايق واكون عندك .
حاضر ي بيه .
معلش يابنى اتكتب عليك من قبل ما تيجى ميكونش ليك أب
ودلوقتى كمان هتبعد عن أمك بس أكيد ربنا كاتبلك الأحسن .
هو مين زكريا المكرمى اللى متابعه اخباره ده ي ساره .
ده ي ستى أشهر واكبر حرامى فى مصر كلها تجارة سلاح وآثار ومخدرات كله قدام عين الحكومه علشان نائب فى مجلس الشعب فيه صحفى خاطر بنفسه وقرر يدخل حرب ضده ويطلعه مسرح قدام الشعب واتفتح ضده قضيه لكن أكيد هياخد منها براءه علشان اللى زى ده مينفعش يتسجن وألا النظام كله يروح فيها .
ده أكيد ي ساره محامى كبير اوى اللى ماسك القضيه بتاعته دى .
أكيد ... متشغليش بالك ي دنيا بالكلام ده خلينا فى الخيال احسن علشان الواقع وحش .
أى اخر الاخبار ي نادر .
حسام بيه اشترى بيت فى طرف المدينه فى منطقه مقطوعه
وسئلت سمحيه قالت لسه مسجلتش الواد ابنها وغالبا كده حسام بيه بيماطل وشكله ناوى يخلص منها فى المكان ده .
ياريت ي نادر بس حسام جوزى انا عارفاه قدام سميحه بيبقى شبه الكتوكت الضعيف ومبيفكرش بعقله .
مش يمكن يكون حسبها بعقله ولقى انه يتخلص منها احسن علشان اسمه وخصوصا انه خلاص بيمتحن علشان يبقى مستشار .
عايزاك تعرف منه على قد ما تقدر ولو كان كلامك صح أنا هديك ضعف اللى اتفقنا عليه كمان .
عم ربيع .... افتح الشنطه وحط فيها الواد .
حاضر ي بيه أمانه عليك تخلى بالك منه .
متخافش ي راجل وتعالى خد الشيك دا خليه معاك ومتسحبش المبلغ مره وحده علشان مفيش حد يحس بحاجه
ولو فكرت بس مع نفسك فى اللى حصل بينا ده هتموت انت واللى معاك دول ومفيش حد هيعرف عنكوا حاجه .
تحت امرك ي بيه ولا هنطق بحرف.
عامله اى دلوقتى ي حبيبتى..!
جيت بدرى يعنى نادر قالى انك هتيجى بالليل .
الصراحه مقدرتش استنى وقولت اجى اطمن عليكى وعلى ابنى سيف .
كمان اختارت اسم ده انت خططت لكل حاجه بقى .
ظبطت كل حاجه استنى جبت اتنين عصير معايا وانا جاى قولت نشربهم واحنا بنتكلم علشان صحتك.
كمان ..!
هو انا عندى اغلى منك ي حبيبتى .... بصى احنا سيف هنعنله شهادتين ميلاد ....
ازاى ي حسام ..
اسمعى كلامى للأخر هنعمل شهاده حقيقيه وهنسبه ليا وشهاده مزوره هنسبه فيها لعم عوض الجنانيى اللى عندى ومتقلقيش انا هراضى عم عوض كويس وفى الوقت المناسب هعلن انه هو ابنى ونطلع الشهاده الحقيقه.
والكلام دا مفيش فيه خطر على ابنى ..!
متخافيش عليه ده ابنى انا كمان.
سميحه .... سميحه .... انتى نمتى .!
تصبحى على خير ...
انت عارف ي زياد انا هعمل كل حاجه علشان تبقى ابنى بس معلش دلوقتى ابوك مفيش فى أيده حاجه غير اللف والدوران علشان لسه ضعيف لكن صدقنى أول لما أوصل هرجعك لحضنى قدام الدنيا كلها ومفيش حد هيقدر يقول كلمه أنت ابن حسام الراوى .
ألو ...
سيادة المستشار ..
مش وقته ي نادر عايزك تجيب موظف من الشهر العقارى على المكتب .
خير ي حسام بيه فيه حاجه..!
متسئلش كتير يلا .
بكره الصبح هيكون على مكتبك ي سيادة المستشار .
هدى ... هدى .
نعم ي حسام بيه.
هو مفيش حد فى البيت ولا أيه ..!
لا ي بيه سعاد هانم لسه بره و دكتوره دنيا مرجعتش لسه .
طيب بسرعه كده افتحى شنطة العربيه بتاعتى هتلاقى طفل صغير هاتيه بسرعه وتعالى وأوعى حد يشوفك.
حاضر ي بيه .
عم ربيع ..! فوق ي عم ربيع .... مين اللى عمل فيك كده ......
وتائب ..! تائب فين ي عم ربيع ... ابنى راح فين .. سعد الحقنى ي سعد ...
فيه أى ي ناهد ... عم ربيع ..! مين اللى عمل فيه كده ؟
معرفش قالى هقعد جمب تائب وريحى أنتى نفسك شويه ..صحيت لقيته مرمى على الارض كدا وابنى مش معاه .. انا هموت ي سعد .
هاتى حاجه نفوقه بيها وهنعرف منه كل حاجه .. بسرعه ي ناهد .
الواد اهو ي حسام بيه .
ادخلى بسرعه ي هدى واقفلى الباب .... اسمعى الكلام دا كويس ي هدى انتى هتاخدى الواد وتروحى حالا ....
بس أنا مطلبتش أجازة من سعاد هنام هروح ازاى...؟
ملكيش دعوه أنا هظبط كل حاجه بس خدى الواد وتروحى
وتشوفى وحده ترضعه وأنا الصبح هعدى اخده منك بالعربيه .....
وخدى الفلوس دى مشى بيها حالك وبكره هعوضك ومتخافيش .
تحت امرك ي حسام بيه.
اهو فاق اهو ... فين تائب ي عم ربيع ..؟
استنى ي ناهد مين اللى عمل فيك كده ي عم ربيع وازاى حصل ..!
أنا آسف ي بنتى ... مقدرتش أخلى بالى من ابنك حقك عليا ... أنا مستاهلش تقوليلى ي عمى .... انا كنت قاعد بلاعب تائب ولقيت اتنين هجموا عليا واحد خبطنى على دماغى والتانى خد منى تائب ومقدرتش أعمل حاجه .....
تائب أكيد هيرجع ي عم ربيع أنا مليش غيره ضحيت بكل حياتى علشانه .... ابنى أكيد مش هيسبنى ..أنا هخرج أدور عليه ومش هرجع غير وهو معايا ..
استنى ي ناهد .... سعد ألحقها ي سعد وخليك معاها .
هدى ....
جيتى ي دنيا .!
ايوه ي بابا هى هدى مش هنا ولا أيه ..!
كلمتنى وأنا فى المكتب وطلبت منى تاخد أجازة يوم علشان أمها تعبانه وعايزه تبقا جمبها وأنا فولتلها تمشى .
ربنا يشفيها وترجعلنا بالسلامه .
المهم طمنينى أى أخبار مذاكرتك ودروسك ؟
الحمد لله ي بابا كله تمام .
آمال اتأخرتى ليه كده ..!
كنت عند ساره صحبتى بنذاكر مع بعض .
حاضر بس متخليش حد يشغلك عن هدفك كلية الطب .
حاضر ي بابا ... بابا ..
نعم فيه حاجه ولا أيه ..!
هو أنت تعرف قضية زكريا المكرمى ..!
وأنتى تعرفى الكلام دا منين ؟
سمعت أصحابى بيتكلموا وكل الأخبار بتتكلم عنه.
ده راجل كبير ومحترم بيساعد الناس فيه عصابه عايزه تخلص منه اتهموه بالكلام دا علشان يخلصوا منه وأنا بدافع عنه .
بس صحبتى قالتلى أنه بيتاجر فى الممنوعات والأسلحة وبيستغل سلطته ...
صحبتك دى متعرفيهاش تانى دى عايزه تضحك عليكى بكلمتين وخلاص ابعدى عنها نهائى وإلا مش هخليكى تخرجى نهائى أنا آسفه ي بابا .
ألو .... انتى فين ي سعاد !
أنا هبات عند بابا النهارده .
وده ليه ... حصل أيه .؟
بابا تعبان روحت أشوفه وهبات معاه للصبح .
خلاص ماشى وصليله سلامى وانا بكره هاجى اطمن عليه .
ألو ... محيى
أهلا ي حسام .. واحشنى ي راجل من لما سافرت وأنت مسئلتش عليا تانى ولا كأن ليك صاحب .
معلش ي محيى مضغوط وانت عارف عايز ابقى مستشار والحياه هنا بقت صعبه اوى .
ربنا يعينك ي حسام ونشوفك قد الدنيا ... مش ناوى تحصلنى قريب بقى ولا ايه ..!
بكره مناسب .؟
بتهزر ! جاى بكره ؟
عايز اشوفك بكره اول طياره على اليونان وهكون عندك .
هتلاقينى مستنيك فى المطار .
صحيت بدرى ي صغير أنت ... حسام بيه هيجى ياخدك دلوقتى ..
ربنا أعلم بيك ابن مين ولا أهلك فين بس الأكيد حرام انهم سابوك كده ي عسل أنت .
عملتوا أيه ي ولاد طول الليل مشغول بالى عليكوا ..
ولا حاجه ي عم ربيع قلبنا المنطقه كلها ولا فيه حد شافه ولا عارفين ندور فين ولا فين .
معلش ي ناهد يبنتى أكيد ربنا هيعوضك خير وهيرجعلك ابنك قريب .
أنا مش عارفه ي عم ربيع ليه كل مره أنا ... ليه الدنيا مصره تعاقبنى على نفس الغلطه طول عمرى ... ليه الدنيا وحشه كده ....
اى فايدة حياتى ... خلاص مبقاش حاجه اتعاقب عليها تانى ... كل ذنبى أنى حبيت وبعد كدا مشوفتش يوم حلو اهلى رفضوه وانا ضعفت قدامه وحملت منه تائب بعدها قرر انه يستغنى عنى علشان أنا إنسانه سهله وأهلى ... أهلى رمونى فى الشارع علشان ضيعت كرامتهم وخليتها فى الارض ندمت واتذللت ليهم كلهم ومفيش حد سامحنى من وقتها مبقاش ليا غير ابنى اللى فى باطنى وعايشه علشانه ..... الدنيا عاقبتنى وخسرته هو كمان ...
اسمعى منى ي بنتى من اول يوم جيتى فيه هنا وانا بعتبرك زى بنتى بالظبط ... الدنيا مش قاسيه ولا وحشه الناس اللى بقت قلوبها حجر الدنيا زمان كانت طيبه علشان الناس كانت طيبه وقلوبهم على بعض وبيسامحوا بعض ويساعدوا بعض لكن
دلوقتى اللى بيغلط بنعلقله النشنقه كأن ولا عمرنا غلطنا قبل كدا الحياه عمت قلوبنا وعقولنا بس ربنا موجود أنتى غلطتى وندمتى وربنا بيختبر ندمك وتوبتك ليه اصبرى يبنتى وان شاء الله ابنك مش هيسبك مهما مر العمر اوعى تخافى أبدا عليه وسلمى أمره لربنا .
هدى .
الواد اهو ي حسام بيه .
خدى ي هدى الفلوس دى خليها معاكى علشان انتى ربنا بيحبك بس .
ربنا يخليك ي بيه .
بس متنسيش مفيش حد يعرف حاجه .
ولا شوفتك ي بيه خالص .
جدعه ابقى روحى البيت وخلى بالك من دنيا علشان أنا مسافر وراجع بكره الصبح ان شاء الله.
تحت امرك ي بيه .
سيادة المستشار .. نورت مكتبك .
عملت اللى قولتلك عليه ي نادر ؟
مستنيك فى المكتب جوه ي حسام بيه .
طيب اعملنا قهوه .
اهلا ي حسام بيه .
منور المكتب ي استاذ ..!
ماهر ي بيه .
منور ي أستاذ ماهر .... انا عايز منك خدمة سريعه كده .
أومر ي بيه .
عايز تلت شهادات ميلاد .
بس كده ... ساعه وحده ويكونوا عندك .
افتح الشنطه دى ي ماهر كده .
فيها شيك فاضى ي بيه .
حط الرقم اللى تحبه .
مقابل أيه .
تلت شهادات ميلاد ... اتنين حقيقين ووحده مزوره .... قولت أيه .
كل خير ي بيه هاخد ربع مليون جنيه .
كتير بس انا موافق ساعه ويكونوا عندى وحده باسم زياد حسام الراوى ودى حقيقية ووحده باسم سيف عوض سالم الغريبى ودى كمان حقيقيه ووحده باسم سيف حسام الراوى ودى مزوره .
ساعه وطلبك يكون عندك ي حسام بيه .
نسيت اقولك ي ماهر كل حاجه اتصورت علشان لو فكرت تقل بعقلك هاخد عقلك منك.
عامله أيه ي ساره ..!
الحمد لله ي صديقى .... وأنتى ؟
الحمد لله ... مستنياكى النهارده مفيش حد فى البيت وعايزاكى تيجى نقعد مع بعض براحتنا.
ماشى هجيب كتبى وأجى بس اعمليلى فطار بقى علشان لسه صاحية .
من عنيا .. متتأخريش بس علشان ممكن يخلص ههههه.
هدى ... كويس انه جيتى النهارده ... مامتك عامله أيه دلوقتى ..!
الحمد لله ي دكتوره دنيا .
يستى أنا مش دكتوره ولا حاجه لسه بصى قوليلى النهارده دنيا كده كده ولا ماما ولا بابا هنا ..... واقولك كمان تعالى خدى
الفستان ده البسيه هيبقى حلو أوى عليكى ... بس اعملي فطار لينا بقى علشان نفطر ونقضى يوم من غير تحكمات وزهق بقى
صحبتى جايه وهنقعد احنا التلاته .
أمرك ي دكتوره .
بردو دكتوره مفيش فايده طب اجى أساعدك ..!
لا لا ارتاحى انتى وأنا 10 دقايق هحضر الفطار .
تسلم إيدك ي هدى.
ألو ...
أيوه ي نادر طمنى.
فيه حاجه ضروريه لازم تعرفيها حالا .
فيه أيه ي نادر اتكلم ..!
مش هينفع فى التليفون ي مدام سعاد ولازم اشوفك دلوقتى .
نص ساعه وهستناك فى الكافيه اللى اتقابلنا فيه المره اللى فاتت .
تمام فى انتظارك .
فين نادر ي خالد ؟
لسه خارج حالا ي حسام بيه شكله عنده حاجه ضروريه.
غريبه معرفنيش ... مش مشكله تابع انت الشغل وانا هروح زياره سريعه لنافع بيه البنهاوى علشان تعبان والامتحان بتاعى بكره .
تحت امرك ي حسام بيه .
مش هينفع تفضلى كده ي ناهد ي بنتى .... أنتى ماكلتيش حاجه صحتك هتروح منك حرام عليكى .
مليش نفس ي عم ربيع خلاص الحياه مبقاش ليها فايده ولا صحتى بقى ليها لازمه .
أنتى مش بتعبرينى زى ابوكى طب ينفع تخلى ابوكى قاعد كده من غير اكل وزعلان عليكى .... يبنتى انتى دموعك نشفت وعينك بقت تنزل دم حرام عليكى نفسك ده اختبار ليكى اصبرى وادعى ربنا وأكيد هو هيعوضك وقادر يرجعلك ابنك .... انتى توبتى وقربتى من ربنا متخليش الشيطان فى أول اختبار يرجعك تانى لنقطة الصفر ... كنتى لوحدك ومقباش ليكى غير ابنك وربنا حب يختبرك فى حبك ويشوفك صادقه ولا لا ... كل دا علشان يقربك منه وعلشان يغفرلك ذنبك متيأسيش يبنتى خلى عندك أمل كبير فى ربنا دايما .
أهلا نافع بيه .... ألف سلامة عليك استاذنا الكبير.
الله يسلمك ي حسام ... بكره إن شاء الله نشوفك مستشار .
هشرفك يعمى إن شاء الله.
عليا بردو الكلام ده ... انا كلمت ناس تبعى فى اللجنه ومتقلقش مضمونه .
ي نافع بيه كلنا تلاميذك وتحت طوعك فى أى وقت ..... آمال فين سعاد مش شايفها ..!
سعاد خرجت قالت عندها مشوار ضرورى وجايه متقلقش مش هتتاخر اكيد .
ساره جت ... خلصتى الفطار ي هدى .
جاهز اهو ي دكتوره .
انتى عارفه لو قولتى دكتوره النهارده تانى هروحك على البيت .
حاضر ي دنيا .
ايوه كده شاطره .
فطارك جاهز اهو ي صاحبى .
اى ده مين دى ..!
دى هدى بتساعدنا فى البيت بس احنا النهارده أصحاب هنخليها تقعد معانا.
اهلا ي هدى .
أهلا ي ست ساره .
ست أيه ي هدى احنا اصحاب هى ساره وانا دنيا ... هروحك والله .
خلاص ي دنيا .
طب يلا نفطر علشان نلحق اليوم من الاول بقى.
فيه اى ي نادر قلقتنى ..؟
انتى طلعتى صح ي مدام سعاد ... حسام بيه ناوى على حاجه كبيره ..النهارده جاب موظف من الشهر العقارى وطلب منه شهادات ميلاد وهيدفع مبلغ كبير اوى وكمان هدده لو حد عرف هيفضحه معرفتش كل التفاصيل بس الحاجات دى لوحدها مصيبه وشاكك أنه فيه لعبه كبيره اوى بتتعمل عليكى .
حسام أنا عارفاه كويس قدام مصلحته يخرب الدنيا ومفيش حد يتوقعه ... حسام ده شيطان على هيئة بنى آدم .. بس انا مش هسكت أنا سعاد نافع البنهاوى وهعرفك ي حسام اقدر اعمل أيه .
ماشى ي نادر هكلمك بعدين علشان لازم ارجع دلوقتى .
ألو .... امانتك جاهزه معايا ي حسام بيه .
ماشى ي ماهر استنانى فى مكتبى وانا جاى .
اسيبهم مع اى حد علشان شغلى ي بيه ..!
لا مش هتأخر عليك بس اوعى تسيبهم هاخدهم انا منك هم والامانه اللى معاك .
روح شوف شغلك ي حسام انا كويس متقلقش .
شغله مع مين مع موظف الشهر العقارى ..!
سعاد أنتى جبتى الكلام ده منين ..!
ده اللى فارقلك ... يعنى ينفع بردو متسجلش ابنك ولا تطلعله شهادة ميلاد .
بتقولى أيه ي بنتى ..؟
دى الحقيقه ي بابا سميحه لسه فى حياتنا وعمرها ما كانت نزوه ولا شهوه وراحت لحالها زى ما حضرتك قولت ... البيه اصلا واخدنى واسطه علشان يعرف يستفيد ويستغل نفوذ نافع البنهاوى لكن انا عنده ولا اى حاجه انت اللى رمتنى له ببلاش ي بابا
وعمرى ما هسامحك على الموضوع ده ابدا .
ايه اللى سعاد بتقوله ده ي حسام ... احنا مش قفلنا قصة البت دى وخلاص .... حسام انت نسيت نفسك ولا أيه ..!
ي عمى هفهم حضرتك انتوا فاهمين غلط ... اه سميحه لسه موجوده بس انا بحاول استخدم سلطتى وامحيها من حياتى من غير اى دوشه ووجع دماغ ... أنا عرفت انها حامل وكانت مصره لما تولد تعرف الناس كلها انه ابنى وكل اللى حصل بينا انا وهى ... انا قولتلها موافق اعترف بيه وهعمله شهادة ميلاد باسمى كمان لكن هتكون مزوره ووقت ما تفتح بوقها وتتكلم هتتسجن وكدا ابقا ضمنت سكوتها اكبر فتره ممكنه ولما تفكر تتكلم هتختفى خالص وهى دى الحقيقه ي عمى .
بجد ي حسام ... انا آسفه بجد أنا ظلمتك بس غيرتى اللى خلتنى اتصرف كده .
عارف ي حبيبتى انا مكنتش حابب اشغل بالك بس متقلقيش
هتشوفى بنفسك كل حاجه ... هستأذن انا بقى علشان الحق الموظف ده قبل ما يرجع تانى .
يبنتى خليكى عاقله شويه حسام جوزك من ولادى المخلصين ليا وعمره ما يبيعك ابدا .
ما تحكيلنا بقى ي هدى انتى ليه متجوزتيش لحد دلوقتى ..؟
نصيبى كده بنت فقيره وشغاله فى البيوت أكيد مفيش حد هيبصلى الا اللى عايز وحده خدامه ولو زهق منها هيرميها الدنيا كده لما بتيجى على حد بتاخد منه كل حاجه بس الحمد لله أنا راضيه
بنصيبى .... انتوا عايزين تخلوا القعده كئيبه ولا أيه ... احكولى انتوا بقى كل وحده بتكراش على مين ..!
أنا ولا بكراش على حد ولا حد بيكراش عليا.
بتكذب عليكى خلى بالك ساره بتكراش على خالد اللى فى المكتب مع بابا وهو كمان بيضحكلها يعنى واقع هههه .
على فكره ي دنيا أنتى مبتعرفيش تخبى سر أبدا ... مش هقولك حاجه تانى .
ي صاحبى احنا بنتسلى وبعدين انا اعرفك اساعدك فى حوار خالد ده.
طب ما تقولى انتى ي دنيا بقى بتكراشى على مين ..!
اقولكوا ومتضحكوش ..! بكراش على الواد سيد حته اللى بيشد برشام ده .
يخربيتك اى اللى بتقوليه ده ي دنيا .
هدى اوعى ماما او بابا حد يعرف بالكلام ده رقبتى تروح فيها ...
أنا اصلا مبعرفش أحب الواد حياته مبهدله وطريقه كلامه غريبه وبيضحكنى طريقته حاجه اول مره اشوفها لكن انا عمرى محد حبنى علشان كده مبعرفش أحب اصل هجيب المشاعر دى منين مواعيد خروج وأكل ونوم واصحاب وكل حاجه فى حياتى بابا وماما اللى بيختاروها وياريت علشانى لا علشان شكلها
واحترامهم قدام الناس حتى مستقبلى هم اللى عايزين يحددوه ...
فعلا فاقد الشئ لا يعطيه حتى لو حاول بردو هيفشل مفيش فايده .
انا حاسه بيكى ي حبيبتى وبعدين أيه مفيش حد بيحبنى دى آمال انا بعمل أيه هاا .
ي ساره أنتى الانسانه الوحيده اللى عرفت تفهمنى وتقرب منى رغم كده ....
أيه ي حبيبتى .!
لا لا خلاص كنت هعك الدنيا هههه.
انا بقول تروحوا تذاكروا شويه بقى بدل النكد ده دفعه شكلها نكد كلها .
ماشى ي هدى ما انتى اللى بدأتيها.
أهلا ي حسام انت طلعت بتكلم صح بقى مكنتش مصدق انك جاى فعلا.
مقدرش ارجع فى كلامى لازم اجى .
طب احنا نقعد نتغدى مع بعض بقى وبعد كده نتكلم على راحتنا .
لا اعذرنى ي محيى أنا جاى وماشى علطول عايزك فى مشكله ضروريه..
مشكلة أى دى ؟
الواد ده ابنى ودى شهادة ميلاده اهى وعايز اخليه معاك هنا لحد اعرف اظبط أمورى فى مصر .
الواد مش ابن سعاد ده مش صح كده ..!
لا .. بس دا حوار طويل هبقا اشرحه ليك وقت تانى هتواصل معاك على فترات كده اشوفه واطمن عليه .. الواد امانه فى رقبتك ي محيى.
اطمن ي حسام ده زى ابنى بالظبط.
هلحق انا معاد الطياره بقى علشان مضطر ارجع علطول مفيش حد يعرف انه أنا هنا .
ماشى ي عم بس الزياره دى مش محسوبه .
اكيد هنتقابل تانى ان شاء الله.